İlk dəfə maşın almaq bir az həyəcanlı, bir az da qorxuludur. “Görəsən aldığım maşın məni yolda qoymaz?” sualı, ya da “Məni aldatmasınlar?” düşüncəsi hamıda olur. Narahat olma, bu yazıda sənə sənin dilində, yəni sadə və səmimi şəkildə başa salacam ki, maşın alarkən nəyə baxmalısan.
1. Büdcəni dəqiq bil
Əvvəlcə özünə sual ver: “Nə qədər pulum var?” Amma təkcə maşının qiymətini yox, əlavə xərcləri də düşün:
- Rüsum
- Texniki baxış
- Sığorta
- Gələcək təmir xərcləri
Yəni cibində 15.000 varsa, elə 15.000-lik maşına baxma. 13.000-lik al ki, qalanını bu işlərə saxlayasan.
2. Avtomatik yoxsa mexaniki?
Yeni başlayanlarsansa, çox vaxt avtomatik sürətlər qutusu rahat olur. Tıxacda, şəhər içində səni yormur. Amma mexaniki sürənlər də deyir “əsl sürmək budur”. Seçim sənindir, amma rahatlığı üstün tutursansa, avtomatik götür.
3. Yeni yoxsa ikinci əl?
- Yeni maşın: Zəmanət var, təmizdi, amma bahalıdı.
- İkinci əl maşın: Ucuzdu, amma diqqətli olmalısan. Hər “birinci sahibindən” deyəni alma. Mütləq ustaya göstər.
4. Texniki vəziyyəti yoxlat
İkinci əl maşın alırsansa:
- Mühərrikin səsi normal olmalıdır
- Yağ sızması olmamalıdır
- Süspensiya, tormoz sistemi normal işləməlidir
- Qəzaya düşüb-düşmədiyini ustaya göstərməklə öyrən
Mütləq etibar etdiyin bir ustaya apar, ya da ekspertizadan keçir.
5. Salonda və gövdədə nələrə baxmalısan?
- Qapılar eyni səviyyədə bağlanır?
- Rənglərdə fərq var? Demək bəlkə də rənglənib
- Oturacaqlar, salon içi – çox köhnə və ya çox təzədirsə, şübhələn
- Probel (yürüş) real görünür? 20 illik maşın 70 min km yazırsa, orda nəsə var 😄
6. Sənədlərini yoxla
Maşının vəsiqəsi, qeydiyyat kağızları, cərimə və ya girov olub-olmaması mütləq yoxlanmalıdır. Egov.az, Asan Login ilə bunu rahat yoxlaya bilərsən.
7. Test sürüşü et
Hər şey sənə uyğun gəlsə belə, mütləq sür! Otur, sükanı tut, hiss et. Güzgülər sənə uyğun yerləşirmi, sürəndə özünü rahat hiss edirsənmi? Maşınla bağ qurmalısan, çünki gündəlik yoldaşındır.
Sonda: Qəlbinlə yox, məntiqlə seç!
Maşın almaq hisslərlə olmamalıdır. “Çox gözəldi, alıram” demə. Sakit düşün, müqayisə et, araşdır. Hətta bir gün sonra qayıdıb al – tələsik qərar vermə.
Unutma, maşın almaq sərmayədir, sadəcə əyləncə deyil. 😊
